Who Is GDN: 100 ఏళ్ల కిందటే మేక్ ఇన్ ఇండియాకు పునాది... ఎవరీ జీడీఎన్?

 


విలక్షణ నటుడు మాధవన్ హీరోగా నటించిన లేటెస్ట్ మూవీ జీడీఎన్. కొయంబత్తూరుకు చెందిన భారతీయ శాస్త్రవేత్త, ఇంజనీర్, పారిశ్రామికవేత్త గోపాలస్వామి దొరస్వామి నాయుడు జీవితం, ఆయన సాధించిన విశేషాలు ఇతివృత్తంగా ఈ సినిమాను తెరకెక్కించారు. ఇందులో జీడీఎన్‌గా మాధవన్ టైటిల్ రోల్ పోషించారు. ఈ సినిమా టైటిల్ ప్రకటించిన నాటి నుంచే ప్రత్యేకత సంతరించుకుంది. మాధవన్ లుక్ బయటకు వచ్చిన తర్వాత అంచనాలు మరింత పెరిగిపోయాయి. ఆగస్ట్ 7న జీడీఎన్ విడుదల కానుంది. అయితే ఎవరీ జీడీఎన్? ఆయన జీవితం ఏంటీ? జీడీఎన్ సాధించిన విజయాలు ఏంటీ? అనే ఆసక్తి జెన్ జీ పిల్లల్లో నెలకొంది. 

కోయంబత్తూరులో స్థిరపడిన తెలుగు రైతు కుటుంబంలో 1893 మార్చి 23న జన్మించారు జీడీ నాయుడు. ఆయన పుట్టిన కొద్దినెలలకే తల్లి చనిపోయారు. అనివార్య కారణాలతో మూడో తరగతిలోనే చదువు మానేశారు. కోయంబత్తూరులోని ఓ హోటల్‌లో సర్వర్‌గా ప్రస్థానం ప్రారంభించిన ఆయన రూపాయి రూపాయి కూడబెట్టి దాచిన డబ్బుతో చిన్న మోటార్ సైకిల్ కొనుగోలు చేసి ప్రయోగాలు ప్రారంభించారు. ఆ మోటార్ సైకిల్‌లోని ప్రతి భాగాన్ని విడదీసి.. మళ్లీ బిగించి మెకానిక్‌గా మారిపోయారు. 

1920లలో ఒక ఆటోమొబైల్ కోచ్‌ను కొన్న ఆయన ట్రాన్స్‌పోర్ట్ బిజినెస్‌లోకి దిగారు. పొల్లాచ్చి నుంచి పళని వరకు ప్రయాణించారు. కొన్నేళ్లకే వ్యాపారంలో సత్తా చాటిన నాయుడు తన యూనివర్సల్ మోటార్ సర్వీస్ (యూఎంఎస్)తో దేశవ్యాప్తంగా ట్రాన్స్‌పోర్ట్ రంగంలో గుర్తింపు సంపాదించారు. కేవలం 13 సంవత్సరాలలోనే ఆయన రవాణా సామ్రాజ్యం అనూహ్యంగా విస్తరించి  280కి పైగా బస్సులను కలిగి దేశంలోనే అతిపెద్ద ప్రైవేట్ బస్సు కంపెనీలలో ఒకటిగా ఘనత వహించింది. 

1930లో న్యూ ఎలక్ట్రిక్ వర్క్స్ కంపెనీని ప్రారంభించి ఎలక్ట్రిక్ మోటార్లను ఉత్పత్తి చేశారు. భారతదేశంలో తొలి మోటార్‌ను జీడీ నాయుడు కంపెనీయే తయారు చేసింది. కోయంబత్తూరులో ఉన్న ఆయన ఫ్యాక్టరీ నేషనల్ ఎలక్ట్రిక్ వర్క్స్ ఈ వినూత్న ఆవిష్కరణ చేసింది. అలాగే గోపాల్ క్లాక్ ఇండస్ట్రీ కూడా వినియోగదారుల ఆదరణను పొందింది. 

నాయుడు.. పరిశోధనలు, సంచలనాలు అక్కడితో ఆగలేదు. 1937లో డీ బాలసుందరం నాయుడుతో కలిసి భారతదేశంలో తొలి ఇండిజెనస్ మోటర్‌ను తయారు చేశారు. ఈ విజయంతో బాలసుందరం టెక్ట్స్‌టూల్‌ను కనుగొని టెక్ట్స్‌టూల్ బాలసుందరంగా మారారు. ఆ తర్వాత డ్రై సెల్స్‌తో రేజర్‌ను తయారు  చేశారు జీడీఎన్. సూపర్ థిన్ షేవింగ్ బ్లేడ్స్‌, సినిమా కెమెరాలలో డిస్టెన్స్ అడ్జెస్టర్, ఫ్రూట్ జ్యూస్ ఎక్స్‌ట్రాక్టర్, టాంపర్ ప్రూఫ్ వోట్ రికార్డింగ్ మెషిన్, కిరోసిన్‌తో నడిచే ఫ్యాన్, ఫైవ్ వాల్వ్ రేడియో సెట్స్, టూ సీటర్‌ పెట్రోల్ ఇంజిన్ కార్ తదితర ఆవిష్కరణలతో సంచలనం సృష్టించారు జీడీఎన్. 

అయితే ఆయన ప్రయోగాలకు ప్రభుత్వం నుంచి సరైన ప్రోత్సహం లభించలేదు, లైసెన్స్ మంజూరు చేయడానికి కూడా ముందుకు వచ్చేది కాదు. దాంతో ఆయన ఆటోమోటివ్స్ ప్రయోగాలను పక్కనపెట్టి.. రైతాంగానికి కొత్తరకం పత్తి, బొప్పాయి, మొక్కజోన్న విత్తనాలను తయారు చేశారు జీడీఎన్. ఆయన వ్యవసాయ క్షేత్రాన్ని దిగ్గజ శాస్త్రవేత్త సర్ సీవీ రామన్, ప్రపంచ ప్రఖ్యాత ఇంజనీర్, భారతరత్న సర్ మోక్షగుండం విశ్వేశ్వరయ్యలు సందర్శించారు. ఇక కేవలం 11 గంటల రికార్డ్ సమయంలోనే ఇంటిని నిర్మించి సంచనం సృష్టించారు జడీఎన్. 

1922లో లండన్‌లో జరిగిన కింగ్ జార్జ్ V అంత్యక్రియలను వ్యక్తిగతంగా వీడియో తీశారు. జర్మనీ నియంత అడాల్ఫ్ హిట్లర్‌ను కూడా జీడీఎన్ కలిశారు. అప్పటి కాంగ్రెస్ అగ్రనేత కే కామరాజ్‌తో సన్నిహితంగా ఉండేవారు జీడీఎన్. అలాగే జాతిపతి మహాత్మాగాంధీ, తొలి ప్రధాని పండిట్ జవహర్‌లాల్ నెహ్రూ, నేతాజీ సుభాష్ చంద్రబోస్‌లను తన కెమెరాలో బంధించారు. రాజకీయాలపై ఆసక్తితో 1936 ప్రావిన్సియల్ ఎన్నికల్లో పోటీ చేసి ఓటమి పాలవ్వడంతో రాజకీయాల నుంచి తప్పుకున్నారు. నాయుడుకు రోల్స్ రాయిస్ కారు బహుమతిగా లభించగా.. ఆ రోజుల్లో అంతటి విలాసవంతమైన కారును కలిగివున్న ఏకైక వ్యక్తి జీడీఎన్ కావడం విశేషం. 

1944లో ఆటోమొబైల్ తదితర ప్రయోగాల నుంచి పదవీ విరమణ తీసుకున్న జీడీఎన్.. సామాజిక సేవా కార్యక్రమాలతో సంచలనం సృష్టించారు. 1945లో కోయంబత్తూరులో భారతదేశంలోనే మొట్టమొదటి పాలిటెక్నిక్ కాలేజీ అయిన ఆర్ధర్ హోప్ పాలిటెక్నిక్ కాలేజీ (ప్రస్తుతం ప్రభుత్వ పాలిటెక్నిక్ కాలేజీ)ని స్థాపించడానికి చొరవ తీసుకుని భారీ విరాళాలు అందజేయడంతో పాటు ఈ కాలేజీకి ప్రిన్సిపాల్‌గానూ వ్యవహరించారు. 

ఆ సమయంలో పాలిటెక్నిక్‌ కోర్సుకు 4 ఏళ్ల కాలం విద్యార్ధుల సమయాన్ని వృథా చేయడమేనని భావించిన జీవిఎన్ దానిని రెండేళ్లకు తగ్గించాలని ప్రభుత్వాన్ని కోరారు. అయితే ఆయన ప్రతిపాదనను అప్పటి బ్రిటీష్ ప్రభుత్వం తిరస్కరించడంతో పాలిటెక్నిక్ కాలేజీ ప్రిన్సిపాల్‌ పదవికి రాజీనామా చేశారు. 1967లో జడీ నాయుడు ఇండస్ట్రియల్ ఎగ్జిబిషన్‌ను స్థాపించారు. 

తన ఇంజనీరింగ్, మాన్యుఫాక్చరింగ్ కంపెనీలలో వేలాదిమందికి ఉద్యోగాలు కల్పించారు జీడీఎన్. ఎలక్ట్రికల్, మెకానికల్, అగ్రికల్చర్, హైబ్రీడ్ కల్టీవేషన్, ఆటోమొబైల్ ఇంజనీరింగ్‌లో ఎన్నో పరిశోధనలు, ఎన్నో ఆవిష్కరణలు చేసి కోయంబత్తూరు నగరం దేశంలోనే ప్రధాన పారిశ్రామిక కేంద్రంగా మార్చడంలో కీలకపాత్ర పోషించారు. సామాన్య ప్రజల జీవితాలపై గొప్ప ప్రభావాన్ని చూపిన ఎన్నో వస్తువులను జీడీఎన్ ఆవిష్కరించి.. మేక్ ఇన్ ఇండియా, ఆత్మనిర్భర్ భారత్ ప్రాజెక్ట్‌లను వందేళ్ల క్రితమే ప్రారంభించి స్థానికంగా వస్తువులను ఆవిష్కరించడానికి పునాది వేసిన ఘనత జీడీ నాయుడుదే. 

1974లో 80 ఏళ్ల వయసులో జీడీ నాయుడు తుదిశ్వాస విడిచారు. ఆయనకు కుమారుడు జీడీ గోపాల్, మనవడు జీడీ రాజ్‌కుమార్, మనవరాలు శాంతిని ఉన్నారు. జీడీఎన్ గౌరవార్థం కోయంబత్తూరులోని ఒక స్కూల్‌కు జీడీ మెట్రిక్యూలేషన్ హయ్యర్ సెకండరీ స్కూల్, జీడీ పబ్లిక్ స్కూల్‌కు ఆయన పేరు పెట్టారు. అలాగే ఓ రోడ్డుకు జీడీ నాయుడు ఎలివేటెడ్ ఎక్స్‌ప్రెస్ వేగా  నామకరణం చేశారు. 


ఐడియాను దాచుకోవద్దు.. అమ్మేయండి.. పాతికేళ్ల వ్యాపారవేత్త సక్సెస్ స్టోరీ

 


ప్రస్తుతం జెన్ జీ జనరేషన్ ఆకాశామే హద్దుగా చెలరేగిపోతున్నారు. ఎలాంటి బ్యాక్‌గ్రౌండ్ లేకపోయినా, సాదాసీదా కుటుంబం నుంచి వచ్చినా జీవితంలో సక్సెస్ కొడుతున్నారు. పుట్టినప్పటి నుంచే టెక్నాలజీని వాడుతున్న ఈ తరం వారు.. ఏ సెక్టార్ అయినా సరే తమదైన బెంచ్ మార్క్‌లు సెట్ చేస్తున్నారు. నిండా పాతికేళ్లు కూడా దాటకుండానే కోటీశ్వరులుగా మారిపోతున్న వారు ఉన్నారు. ఒక ఐడియా జీవితాన్ని మార్చేస్తుందని సూత్రానికి తమ తెలివితేటలు జోడించి జెండా ఎగురవేస్తున్నారు. తాజాగా ఓ పాతికేళ్ల కుర్రాడు తన తెలివితేటలతో వ్యాపారవేత్తగా అద్భుతాలు సృష్టిస్తున్నాడు. ఆయన సక్సెస్ స్టోరీ మీకోసం.

అతను ఎవరో కాదు.. జెడిటల్ మీడియా వ్యవస్థాపకుడు జైద్ ఖాన్. మధ్య తరగతి కుటుంబానికి చెందిన ఖాన్.. తొలుత డాక్టర్ కావాలని కలలు కన్నారు. ఒకవేళ నీట్‌లో క్వాలిఫై కాకపోతే ఇంజనీరింగ్ ‌సెకండ్ ఛాయిస్‌గా పెట్టుకున్నారు. అయితే డెస్టినీ ఆయనను  మరో మార్గం వైపు నడిపించింది. యూట్యూబ్ ఛానెల్స్‌కు పనిచేయడం ప్రారంభించి, కాలిఫోర్నియాకు చెందిన ఓ ఫేమస్ సోషల్ మీడియా ఇన్‌ఫ్లూయెన్సర్‌తో పాటు కొన్ని ఫ్రీలాన్స్ ప్రాజెక్ట్‌లను దక్కించుకున్నాడు. పర్సనల్ బ్రాండింగ్, మీమ్ మార్కెటింగ్, కంటెంట్ డిస్ట్రిబ్యూషన్, లింక్డ్ ఇన్ ప్రొఫైల్స్‌ నిర్వహణ సేవలను జెడిటల్ మీడియా ప్రైవేట్ లిమిటెడ్‌ ద్వారా అందిస్తున్నారు.

ఇటీవల ది క్రోర్ క్లబ్ పాడ్‌కాస్ట్‌లో పాల్గొని తన వ్యాపార ప్రయాణం, ఆర్ధిక విజయాలు గురించి ఆసక్తికర విషయాలు పంచుకున్నారు జైద్ ఖాన్. మీ దగ్గర ఉన్నది నైపుణ్యం, సలహా.. ఏం ఉన్నా సరే ముందు అమ్మడం మొదలుపెట్టాలి. అది 100 డాలర్లయినా, 200 డాలర్లయినా సరే.. ఇది మీలోని ఆత్మ విశ్వాసాన్ని మరో స్థాయికి చేరుస్తుంది. ఆన్‌లైన్‌లో యాక్టీవ్‌గా ఉండటం, మీకంటూ ఫాలోవర్స్‌ను సొంతం చేసుకోవాలని ఖాన్ తెలిపారు.

2023లో నా 22వ యేట తొలిసారిగా కోటి రూపాయల ఆదాయాన్ని ఆర్జించానని అప్పటి నుంచి తన వ్యాపారాన్ని విస్తరిస్తూనే ఉన్నానని.. విద్యాపరంగా మరింత పరిజ్ఞానాన్ని పెంచుకోవడానికి ఐఐఎం బెంగళూరులో చదువుకుంటున్నట్లు చెప్పాడు. నేను జీవితంలో వెనుకబడిపోయింది చదువు విషయంలోనే.. అందుకే కొత్త విషయాలు నేర్చుకుంటూ వాటిని వ్యాపారంలో అమలు చేస్తున్నా. మనం ఏం సాధించాలనుకున్నా దానికి డబ్బు ఇంధనం వంటిదని ఖాన్ చెప్పారు.

ఈ ప్రయాణంలో నా తల్లిదండ్రులు నాపై నమ్మకం ఉంచారు. నీట్‌కు 10 రోజుల ముందు నన్ను జర్నలిజంలో చేర్చించారు. కానన్ 80డీ కెమెరాతో వీడియోలు తీసి యూట్యూబ్ ఛానెల్‌లో అప్‌లోడ్ చేసి ప్రొడక్షన్ హౌస్ ప్రారంభించే స్థాయికి ఎదిగినట్లు ఖాన్ వెల్లడించారు. కంటెంట్ అనేది డిజిటల్ కరెన్సీ.. ఆన్‌లైన్‌లో యాక్టీవ్‌గా లేనప్పుడు మీరు ఎవ్వరికీ కనిపించరు, ఎవ్వరికీ తెలియదని ఖాన్ అభిప్రాయపడ్డారు. 


దిగ్గజాల సరసన రామ్ పోతినేని..!

 

ఎనర్జిటిక్ స్టార్ రామ్ పోతినేని వరుస ఫ్లాపులతో సతమతం అవుతున్నారు. ఏడేళ్ల క్రితం పూరీ జగన్నాథ్ దర్శకత్వంలో వచ్చిన ఇస్మార్ట్ శంకర్ తర్వాత ఆయన మళ్లీ హిట్ కొట్టలేదు. తర్వాత చేసిన రెడ్, రొమాంటిక్, ది వారియర్, స్కంధ, డబుల్ ఇస్మార్ట్, ఆంధ్రా కింగ్ తాలూకా సినిమాలు బాక్సాఫీస్ వద్ద డిజప్పాయింట్ చేశాయి. దీంతో రేసులో నిలబడాలంటే ఖచ్చితంగా హిట్ కొట్టాల్సిన పరిస్ధితి నెలకొంది. ఇప్పటికే యంగ్ టాలెంట్‌తో పాటు సీనియర్ హీరోల నుంచి రామ్ పోతినేనికి గట్టి పోటీ ఎదురవుతోంది. ఈ నేపథ్యంలో తన 23వ సినిమాకు సంబంధించి ఆయన ఓ నిర్ణయం తీసుకున్నారు. 

దేవదాసు సినిమాతో టాలీవుడ్‌లో ఎంట్రీ ఇచ్చారు రామ్ పోతినేని. తొలి చిత్రంతోనే బ్లాక్‌బస్టర్ హిట్ అందుకున్న రామ్.. ఎనర్జిటిక్ హీరో, చాక్లెట్ బాయ్‌గా అభిమానుల్లో స్టార్‌డమ్ తెచ్చుకున్నాడు. రెడీ, మస్కా, కందిరీగ, రేయ్, నేను శైలజ, హైపర్, ఇస్మార్ట్ శంకర్, డబుల్ ఇస్మార్ట్ వంటి హిట్స్‌తో తనకంటూ గుర్తింపు తెచ్చుకున్నారు. అయితే 20 ఏళ్ల కెరీర్‌లో అనుకున్నంత స్థాయిలో ఆయన సక్సెస్ కాలేదని అభిమానులు ఆవేదన వ్యక్తం చేస్తున్నారు. 

ప్రస్తుతం వరుస ఫ్లాపుల్లో ఉన్న రామ్ పోతినేని.. తన 23వ చిత్రానికి స్వయంగా దర్శకత్వం వహించనున్నారు. ఇప్పటి వరకు నటుడిగా, గాయకుడిగా, గేయ రచయితగా తన టాలెంట్ చూపించిన ఆయన కెరీర్‌లో తొలిసారిగా మెగా ఫోన్ పట్టనున్నారు. మే 15న తన పుట్టినరోజును పురస్కరించుకుని RAPO 23 పోస్టర్‌ను విడుదల చేశారు. ఇందులో రామ్ లెదర జాకెట్‌తో వెనుక నుంచి చూపిస్తూ స్టైలీష్ లుక్‌లో అదరగొట్టేశారు. ఈ సినిమాలో ఆయన వీర అనే క్యారెక్టర్‌ను పోషించనున్నారు. జూన్‌లో సినిమాను సెట్స్ మీదకి తీసుకెళ్లి డిసెంబర్‌లో ప్రేక్షకుల ముందుకు తీసుకురానున్నారు. 

అయితే ఈ సినిమాతో రామ్ అరుదైన ఘనతను అందుకోనున్నారు. తెలుగు చిత్ర పరిశ్రమలో దర్శకులుగా మారిన హీరోల లిస్ట్‌లో ఆయన చేరనున్నారు. విశ్వ విఖ్యాత నటసార్వభౌమ ఎన్టీఆర్, సూపర్‌స్టార్ కృష్ణ, పవర్‌స్టార్ పవన్ కళ్యాణ్ వంటి దిగ్గజాలు హీరోలుగా నటిస్తూనే మెగా ఫోన్ పట్టి తమ అభిరుచి మేరకు సినిమాలకు దర్శకత్వం వహించారు. అన్న ఎన్టీఆర్ సీతారామ కళ్యాణంతో మొదలుపెట్టి శ్రీమద్విరాట్ వీరబ్రహ్మేంద్ర స్వామి చరిత్ర వరకు దాదాపు 15 సినిమాలకు దర్శకత్వం వహించారు. 

ఇక సూపర్‌స్టార్ కృష్ణ సింహాసనం మూవీతో మొదలుపెట్టి ఈశ్వర్ అల్లా తేరే నామ్ వరకు దాదాపు 17 సినిమాలకు దర్శకత్వం వహించి అత్యధిక సినిమాలను డైరెక్ట్ చేసిన హీరోగా ఘనత వహించారు. అలాగే దర్శకుడిగా తెలుగు తెరకు తొలి 70 ఎంఎం, తొలి డీటీఎస్ వంటి టెక్నాలజీలను పరిచయం చేశారు నట శేఖర కృష్ణ. అంతేకాదు.. ఏక కాలంలో తెలుగు, హిందీ భాషల్లోనూ సినిమాలను డైరెక్ట్ చేసిన శెభాష్ అనిపించుకున్నారు కృష్ణ.

ఎన్టీఆర్, కృష్ణల తర్వాత నుంచి చాలామంది తెలుగు అగ్రనటులు దర్శకత్వం వహిస్తారని వార్తలు వచ్చినప్పటికీ ఎవరూ సాహసం చేయలేకపోయారు. మధ్యలో నట సింహం బాలకృష్ణ నర్తనశాల పేరుతో పౌరాణికాన్ని తెరకెక్కించేందుకు మెగా ఫోన్ పట్టినప్పటికీ ఈ ప్రాజెక్ట్ అనివార్య కారణాలతో అర్ధాంతరంగా నిలిచిపోయింది. 

వీరి తర్వాత పవర్‌స్టార్ పవన్ కళ్యాణ్ ఆ సాహసం చేశారు. జానీ సినిమాతో మెగా ఫోన్ పట్టారు. మార్షల్ ఆర్ట్స్ బ్యాక్‌డ్రాప్‌లో ఈ సినిమాను తెరకెక్కించారు పవన్ కళ్యాణ్. 2003 ఏప్రిల్ 25న విడుదలైన జానీ మూవీ అభిమానులను నిరాశపరిచింది. అయినప్పటికీ పవన్ కళ్యాణ్ ప్రయత్నాన్ని విశ్లేషకులు సైతం మెచ్చుకున్నారు. పవన్ కళ్యాణ్ మేకోవర్, జానీ కర్చీఫ్‌లు, బనియన్స్, రిబ్బన్స్, బెల్టులతో మార్కెట్‌లో ప్రభంజనం సృష్టించారు పవన్. 

పవన్ కళ్యాణ్ తర్వాత కొన్నాళ్ల వరకు తెలుగులో మరే హీరో కూడా మెగా ఫోన్ పట్టలేదు. ఈ జనరేషన్‌లో మాస్ దా కాస్ దాస్ విశ్వక్‌సేన్ రెండు చిత్రాలకు దర్శకత్వం వహించారు. మరో సినిమా సెట్స్ మీదుంది. సిద్ధూ జొన్నలగడ్డ, నవీన్ పొలిశెట్టిలు స్క్రిప్ట్, డైరెక్షన్ విషయాలలో జోక్యం చేసుకుంటున్నా.. ఫుల్ టైం డైరెక్టర్లు కాలేదు. యంగ్ హీరో కిరణ్ అబ్బవరం త్వరలోనే మెగా ఫోన్ పట్టుకోనున్నారు. 

అయితే స్టార్ హీరోగా గుర్తింపు తెచ్చుకున్న రామ్ పోతినేని దర్శకుడిగా మారుతుండటం హాట్ టాపిక్‌గా మారింది. తన సోదరుడు చైతన్య కృష్ణ నిర్మాణంలో తన 23వ సినిమాకు దర్శకత్వం వహిస్తున్నారు రామ్. దీనికి స్వయంగా ఆయనే కథ అందిస్తుండటం విశేషం. ఓ సినిమాలో నటిస్తూ.. దానికి దర్శకత్వం వహించడం, స్క్రిప్ట్, మిగిలిన పనులు చూసుకోవడం అంతా కత్తిమీద సాములాంటి వ్యవహారమే. అయితే దీని కోసం రామ్ పోతినేని అన్ని రకాలుగా సిద్ధమైనట్లుగా తెలుస్తోంది. మరి దర్శకుడుగా ఈ ఎనర్జిటిక్ హీరో ఎంత మేరకు సక్సెస్ అవుతాడో చూడాలి. 


తమిళనాడులో టీవీకే చరిత్ర... ఎన్టీఆర్ సరసన దళపతి విజయ్

 

యావత్ దేశం ఆసక్తిగా ఎదురుచూస్తోన్న తమిళనాడు అసెంబ్లీ ఎన్నికలు ఉదయం నుంచే రాజకీయ విశ్లేషకులు, ప్రజలకు షాకిచ్చాయి. ఎగ్జిట్ పోల్స్ ఫలితాల్లో డీఎంకే మరోసారి అధికారాన్ని గెలుచుకుంటుందని, స్టాలిన్ సీఎం అవుతారని అంచనా వేశాయి. అన్నాడీఎంకే మరోసారి ప్రధాన ప్రతిపక్షంగా మారుతుందని వెల్లడించాయి. దళపతి విజయ్ నేతృత్వంలోని టీవీకే చెప్పుకోదగ్గ స్థానాలను గెలుచుకుంటుంది తప్పించి అధికారం కష్టమేనని అంచనా వేశాయి.

కానీ మే 4వ తేదీ ఉదయం ఎన్నికల ఫలితాలు ప్రారంభమైన గంటలోనే వెలువడిన ఫలితాలు షాకిచ్చాయి. అధికారాన్ని అందుకుంటుంది అనుకున్న డీఎంకే మూడో స్థానానికి, అన్నాడీఎంకే రెండో స్థానానికి పరిమితం కాగా.. ఎవ్వరూ ఊహించని విధంగా టీవీకే 100కు పైగా స్థానాల్లో ఆధిక్యంలో నిలిచింది. 234 అసెంబ్లీ స్థానాలున్న తమిళనాడులో అధికారాన్ని అందుకోవడానికి కావాల్సిన మేజిక్ ఫిగర్ (118). ఈ కథనం రాసే సమాయానికి టీవీకే 105, ఏఐఏడీఎంకే 71, డీఎంకే 57 స్థానాల్లో ఆధిక్యంలో ఉన్నాయి. దీంతో తమిళనాడులో హంగ్ ఏర్పడే అవకాశాలు దాదాపుగా కనిపిస్తున్నాయి. అన్నాడీఎంకేతో టీవీకే పొత్తు పెట్టుకోవచ్చని విశ్లేషకులు భావిస్తున్నారు.

పోటీ చేసిన తొలి ఎన్నికల్లోనే ఈ స్థాయి ఫలితాలతో దళపతి విజయ్ చరిత్ర సృష్టించారు. సినిమా వాళ్లు రాజకీయాలకు తారుమారు చేయగలరని ఆయన నిరూపించారు. అంతేకాదు.. సినీ పరిశ్రమ నుంచి ముఖ్యమంత్రి కాబోతున్న వ్యక్తిగా.. కరుణానిధి, అన్నాదురై, ఎంజీఆర్, ఎన్టీఆర్, జయలలిత వంటి దిగ్గజాల సరసన చేరనున్నారు. మరీ ముఖ్యంగా ఎన్టీఆర్ రాజకీయ రంగ ప్రవేశం నాటి రోజులను దళపతి విజయంతో పోల్చి చూస్తున్నారు. 

తెలుగు చిత్ర పరిశ్రమను మూడు దశాబ్ధాలకు పైగా రారాజులా ఏలిన ఎన్టీఆర్ తన సినీ జీవితానికి స్వస్తి పలికి.. ప్రజల కోసం రాజకీయాల్లోకి దిగారు. 1982 మార్చి 29న తెలుగుదేశం పార్టీ స్థాపించి రాష్ట్రవ్యాప్తంగా సుడిగాలి పర్యటన చేపట్టారు. చైతన్య రథంపై ఊరువాడా తిరుగుతూ.. నాటి కాంగ్రెస్ పాలనపై వాడి వేడి విమర్శలు చేశారు. ప్రధానంగా తెలుగు జాతి ఆత్మగౌరవ నినాదం ప్రజల్లోకి బలంగా వెళ్లింది. ఎన్టీఆర్ దెబ్బకు ఉమ్మడి ఆంధ్రప్రదేశ్‌లో అప్రతిహతంగా సాగుతోన్న కాంగ్రెస్ పాలనకు చెక్ పడింది.

1983లో ఉమ్మడి ఆంధ్రప్రదేశ్ అసెంబ్లీకి జరిగిన ఎన్నికల్లో 294 స్థానాలకు గాను తెలుగుదేశం పార్టీ 201 స్థానాలను కైవసం చేసుకుని చరిత్ర సృష్టించగా.. కాంగ్రెస్ పార్టీ 60, సీపీఎం 5, సీపీఐ 4, బీజేపీ 3 స్థానాలు గెలుచుకున్నాయి. పార్టీ పెట్టిన 9 నెలల్లోనే ముఖ్యమంత్రిగా బాధ్యతలు చేపట్టిన ఎన్టీఆర్.. భారత రాజకీయాల్లోనే ఈ ఘనత సాధించిన తొలి నేతగా రికార్డు సృష్టించారు. ఉమ్మడి ఆంధ్రప్రదేశ్‌కు తొలి కాంగ్రెసేతర ముఖ్యమంత్రిగా అన్నగారు నిలిచారు.

తన సంక్షేమ పథకాలు, పాలనతో టీడీపీని ఒక బలమైన రాజకీయ శక్తిగా తీర్చిదిద్దడంతో పాటు లోక్‌సభలో ప్రధాన ప్రతిపక్షంగా వ్యవహరించిన ఏకైక ప్రాంతీయ పార్టీగా నిలబెట్టారు ఎన్టీఆర్. 1984లో అప్పటి ప్రధాని ఇందిరా గాంధీ హత్యతో దేశమంతా కాంగ్రెస్ ప్రభంజనం సృష్టించగా.. ఆంధ్రప్రదేశ్‌‌లో మాత్రం టీడీపీ గాలి వీచింది. ఉమ్మడి ఏపీలోని 42 లోక్‌సభ స్థానాలకు గాను నాటి పార్లమెంట్ ఎన్నికల్లో టీడీపీ కూటమి 35 స్థానాలు గెలుచుకోగా.. కాంగ్రెస్ పార్టీ కేవలం 6 స్థానాలకే పరిమితం కావడం రాజకీయ వర్గాలనే ఆశ్చర్యంలో ముంచెత్తింది.

1983, 1985, 1994లలో ముఖ్యమంత్రిగా బాధ్యతలు చేపట్టిన ఎన్టీఆర్.. తెలుగు రాజకీయాలను సమూలంగా మార్చేశారు. 2 రూపాయలకే కిలో బియ్యం, జనతా వస్త్రాలు, ప్రజల వద్దకే పాలన, ఆడపడుచులకు ఆస్తిలో హక్కు, పటేల్- పట్వారి వ్యవస్ధ రద్దు వంటి చారిత్రాత్మక పథకాలు ఎన్టీఆర్‌ను దేవుడిని చేశాయి. రాష్ట్ర రాజకీయాలతో పాటు జాతీయ రాజకీయాల్లోనూ రామారావు తనదైన ముద్రవేశారు. కాంగ్రెసేతర పక్షాలను ఒకే గొడుగు కిందకి తీసుకొచ్చి నేషనల్ ఫ్రంట్‌గా నామకరణం చేసి... దానికి ఛైర్మన్‌గానూ వ్యవహరించారు.

ఇక విజయ్ విషయానికి వస్తే.. మూడు దశాబ్ధాలకు పైగా సినీ జీవితాన్ని ప్రజల కోసం పక్కనపెట్టి రాజకీయాల్లోకి దిగారు విజయ్. 2009 జూలైలో తమిళనాడు వ్యాప్తంగా ఉన్న తన 85000కు పైగా అభిమాన సంఘాలను ఒకే గొడుగు కిందకి తీసుకొచ్చి దానికి విజయ్ మక్కల్ ఇయక్కమ్ అని నామకరణం చేశారు. 2011లో ఈ అసోసియషన్.. అన్నాడీఎంకేకు అండగా నిలవడంతో నాటి ఎన్నికల్లో జయలలిత ఘన విజయం సాధించారు. అయితే తన బలాన్ని పరీక్షించాలని అనుకున్న విజయ్.. 2021లో తమిళనాడు స్థానిక సంస్థల ఎన్నికల్లో బరిలోకి దిగి 169 స్థానాల్లో పోటీ చేసి 115 స్థానాల్లో గెలుపొందారు.

ఈ క్రమంలో 2024 ఫిబ్రవరి 2వ తేదీన ఆ అసోసియేషన్‌ను తమిళగ వెట్రి కజగం (టీవీకే) అనే పేరుతో రాజకీయ పార్టీగా మార్చారు విజయ్. అదే ఏడాది అక్టోబర్ 27న విల్లుపురంలో జరిగిన పార్టీ తొలి ప్లీనరీకి దాదాపు 10 లక్షల మంది హాజరు కావడం తమిళనాడు రాజకీయాల్లో చర్చనీయాంశమైంది. చేతిలో ఉన్న సినిమాలు ఒక్కొక్కటిగా పూర్తి చేస్తూ వచ్చిన విజయ్.. జన నాయగన్ చిత్రంతో తన నట జీవితానికి వీడ్కోలు పలుకుతున్నట్లు మలేషియాలో ప్రకటించారు.

కరూర్ తొక్కిసలాట, సంగీత విడాకుల నోటీసులు, జన నాయగన్ సినిమా వాయిదా వంటి వివాదాలు చుట్టుముడుతున్నా తట్టుకుని నిలబడ్డారు విజయ్. డీఎంకే, అన్నాడీఎంకేల అంగబలం, అర్ధ బలం ముందు తాను సరిపోనని తెలిసినప్పటికీ, ఒంటరిగానే బరిలోకి దిగుతానని.. ఎవరి జెండా మోయనని విజయ్ బలంగా సంకేతాలు పంపారు. ఎంతో శ్రమించి రాష్ట్రవ్యాప్తంగా సుడిగాలి పర్యటనలు సాగించారు. 

ఎగ్జిట్ పోల్స్ ఫలితాల్లో డీఎంకే మరోసారి అధికారంలోకి వస్తుందని ఎగ్జిట్ పోల్స్ ఫలితాలు అంచనా వేశాయి. కానీ ఒకే ఒక్క సర్వే మాత్రం విజయ్‌దే విజయమని తేల్చిచెప్పింది. చివరికి ఆ అంచనాను నిజం చేస్తూ విజయ్ విజిల్ మోగించారు. అన్న ఎన్టీఆర్ మాదిరిగానే పార్టీ పెట్టిన కొంతకాలానికే ముఖ్యమంత్రి పీఠాన్ని అధిరోహించనున్నారు విజయ్. హంగ్ అసెంబ్లీ పరిస్ధితులు కనిపిస్తుండటంతో విజయ్ ఎవరితో జట్టు కడతారు? పవర్ షేరింగ్ ఎలా అన్నది ఆసక్తిగా మారింది.

ఇరాన్‌పై ట్రంప్ దూకుడు... మరో భారీ ఆపరేషన్‌కు ఇండియా రెడీ?

 


అమెరికా అధ్యక్షుడు డొనాల్డ్ ట్రంప్ దూకుడుతో ప్రపంచం వణికిపోతోంది. కొద్దిరోజుల క్రితం వెనిజులా అధ్యక్షుడు, అతని భార్యను అరెస్ట్ చేసి రాత్రికి రాత్రి న్యూయార్క్ తరలించి ప్రపంచాన్ని కలవరపాటుకు గురిచేశారు ట్రంప్. అక్కడితో ఆగకుండా తానే వెనిజులాకు తాత్కాలిక అధ్యక్షుడినని ప్రకటించారు. అమెరికా భద్రత, డ్రగ్స్ నిర్మూలన‌కే ఈ సైనిక చర్య చేపట్టినట్లు ట్రంప్ చెబుతున్నప్పటికీ.. వెనిజులాలోని చమురు, పెట్రోల్ వనరులపై ఆధిపత్యం కోసమే అగ్రరాజ్యం ఇలాంటి సంచలన నిర్ణయం తీసుకున్నట్లుగా విశ్లేషకులు అభిప్రాయపడుతున్నారు.

గ్రీన్‌లాండ్‌పై ట్రంప్ కన్ను

వెనిజులాపై సైనిక చర్యను మరిచిపోకముందే ట్రంప్ మరో సంచలన నిర్ణయం తీసుకునే దిశగా అడుగులు వేస్తున్నారు. గ్రీన్‌లాండ్‌ను స్వాధీనం చేసుకునేందుకు ఆయన పావులు కదుపుతున్నారు. అమెరికా జాతీయ భద్రత దృష్ట్యా గ్రీన్‌లాండ్ తమకే దక్కాలని.. ఇందుకు నాటో దేశాలు చొరవ చూపాలని లేదంటే రష్యా, చైనాలు దానిని ఆక్రమించుకుంటాయని ట్రంప్ చెబుతున్నారు. అయితే తోటి నాటో దేశం ఆధీనంలో ఉన్న గ్రీన్‌లాండ్‌పై సైనిక చర్యను ఆ కూటమిలోని దేశాలతో పాటు అంతర్జాతీయ సమాజం వ్యతిరేకిస్తోంది. ఈ వివాదం ముదురుతున్న దశలోనే ఇరాన్‌లో అక్కడి ప్రభుత్వంపై ప్రజలు తిరుగుబాటు చేయడం, నిరసనలను అణిచివేసేందుకు ఇరాన్ పెద్దలు కఠినంగా వ్యవహరిస్తుండటంతో అమెరికా అధ్యక్షుడు డొనాల్డ్ ట్రంప్ సీరియస్ అయ్యారు.

ఇరాన్ నిరసనలకు ట్రంప్ మద్ధతు

ఇరాన్‌లో నిరసనకారులకు ఆయన బహిరంగంగా మద్ధతు పలకడంతో పాటు నిరసనలను ఖండించారు. ఇరాన్ ప్రజలకు అమెరికా అండగా ఉంటుందని.. నిరసనలు ఆపొద్దని సోషలో మీడియాలో పేర్కొన్నారు. ఆందోళనలను అణిచివేసే క్రమంలో మానవత్వంతో వ్యవహరించాలని లేనిపక్షంలో ఇరాన్‌ భారీ మూల్యం చెల్లించక తప్పదని ట్రంప్ హెచ్చరించారు. అయితే అగ్రరాజ్యాధినేత ఈ స్థాయిలో వార్నింగ్ ఇచ్చినా ఇరాన్ ఏమాత్రం తగ్గడం లేదు. అరెస్ట్ చేసిన ఆందోళనకారులకు మరణశిక్ష సహా కఠినమైన శిక్షలను విధించాలని అక్కడి ప్రభుత్వం పెద్దలు ప్రణాళికలు రూపొందిస్తున్నారు.

పశ్చిమాసియాలో యుద్ధ మేఘాలు

ఈ పరిణామాల నేపథ్యంలో అమెరికా ఏ క్షణామైనా ఇరాన్‌పై విరుచుకుపడే అవకాశాలు ఉండటంతో గల్ఫ్, పశ్చిమాసియా దేశాలలో యుద్ధ మేఘాలు కమ్ముకున్నాయి. ఇరాన్‌పై సైనిక చర్యకు ట్రంప్ నిర్ణయించినట్లుగా అంతర్జాతీయ మీడియాలో కథనాలు వస్తున్నాయి. దీనికి తగినట్లుగానే అగ్రరాజ్యం.. తనకు గల్ఫ్, పశ్చిమాసియా దేశాలలో ఉన్న సైనిక స్థావరాలను అప్రమత్తం చేయడంతో పాటు ఆయుధ సంపత్తిని భారీగా మొహరిస్తోంది. అలాగే అమెరికాకు దాని మిత్రపక్షాల నుంచి కూడా సంపూర్ణ సహకారం లభిస్తోంది. అటు ఇజ్రాయెల్ కూడా మరోవైపు నుంచి ఇరాన్‌ను కమ్మేయడం ఖాయంగా కనిపిస్తుండటంతో ఇరాన్‌లో రాగల 24 గంటల్లో ఏం జరుగుతుందోనని అంతర్జాతీయ దేశాలు ఆసక్తిగా గమనిస్తున్నాయి.

ప్రపంచ దేశాలు అలర్ట్

ఇరాన్‌లో పరిస్ధితుల నేపథ్యంలో ప్రపంచ దేశాలు అలర్ట్ అయ్యాయి. తమ పౌరులు తక్షణం ఇరాన్ విడిచి వచ్చేయడంతో పాటు ఆ దేశానికి విమాన సర్వీసులను సైతం నిలిపివేశాయి. అటు భారతదేశం కూడా అప్రమత్తమైంది. ఇప్పటికే పలుమార్లు అడ్వైజరీలను జారీ చేయగా.. తాజాగా పలు మార్గాల్లో భారతీయులు ఇరాన్‌ను వీడాలని కేంద్ర విదేశాంగ శాఖ సూచించింది. అలాగే ఇరాన్ నుంచి భారతీయులను క్షేమంగా స్వదేశానికి తిరిగి తీసుకురావడానికి భారీ ఆపరేషన్‌కు శ్రీకారం చుట్టినట్లుగా వార్తలు వస్తున్నాయి.

ఇరాన్‌లో 10 వేలమంది భారతీయులు

విదేశాంగ శాఖ లెక్కల ప్రకారం ఇరాన్ వ్యాప్తంగా దాదాపు 10 వేలమంది భారతీయులు ఉన్నట్లుగా అంచనా. ఇంటర్నెట్ సేవలు, రవాణా సేవలు స్తంభించిపోవడంతో వీరి తరలింపులో ఆటంకాలు ఎదురయ్యే అవకాశాలు కనిపిస్తున్నాయి. అయినప్పటికీ అన్ని రకాల మార్గాల ద్వారా భారతీయులను స్వదేశానికి తరలించేలా కేంద్రం కట్టుదిట్టమైనప ఏర్పాట్లు చేస్తోంది. అయితే భారతదేశానికి ఇలాంటి ఆపరేషన్లు వెన్నతో పెట్టిన విద్య. ఈ తరహా ఆపరేషన్లు నిర్వహించడం కొత్త కూడా కాదు.. కరోనా, లాక్‌డౌన్ సమయంలో వందే భారత్ మిషన్ ద్వారా ప్రపంచం మునుపెన్నడూ చూడని తరలింపు ప్రక్రియ చేపట్టింది ఇండియా.  వివిధ దేశాలలో చిక్కుకుపోయిన దాదాపు 1.83 కోట్ల మంది భారతీయులను స్వదేశానికి క్షేమంగా తీసుకొచ్చి చరిత్ర సృష్టించింది.

భారీ ఆపరేషన్‌కు ఇండియా రెడీ?

2022లో రష్యా - ఉక్రెయిన్ యుద్ధ సమయంలో ఉక్రెయిన్‌లో చిక్కుకుపోయిన భారతీయులను క్షేమంగా స్వదేశానికి తీసుకురావడానికి గాను భారత ప్రభుత్వం ఆపరేషన్ గంగా పేరుతో భారీ ఆపరేషన్ చేపట్టింది. ఉక్రెయిన్ నుంచి రొమానియా, హంగరీ, పోలాండ్, స్లోవాకియా దేశాల మీదుగా 22500 మంది భారతీయులను స్వదేశానికి తరలించింది ఇండియా. ఇక గతేడాది ఇజ్రాయెల్ - ఇరాన్ యుద్ధ సమయంలో ఆపరేషన్ సింధు చేపట్టిన భారతదేశం.. ఇజ్రాయెల్, ఇరాన్‌లలో ఉన్న దాదాపు 4,429 మంది భారతీయులను క్షేమంగా స్వదేశానికి తరలించింది. ఇప్పుడు ఇరాన్‌లో యుద్ధ వాతావరణం నేపథ్యంలో మరోసారి భారతదేశం భారీ ఆపరేషన్‌కు సిద్ధమైనట్లుగా అంతర్జాతీయ మీడియాలో కథనాలు వస్తున్నాయి. మరి ఇందులో ఎంత వరకు నిజముందో తెలియాలంటే భారత విదేశాంగ శాఖ నుంచి అధికారికంగా ప్రకటన వెలువడాల్సిందే.