Exit Polls 2026: మమత, స్టాలిన్‌, హిమంతలకు మరో ఛాన్స్.. ఇద్దరు విజయ్‌లకి షాక్ తప్పదా?

ఈ ఏడాది తమిళనాడు, పశ్చిమ బెంగాల్ ఎన్నికలు ఎక్కువ ఆసక్తిని కలిగించాయి. కోలీవుడ్ సూపర్‌స్టార్, దళపతి విజయ్ టీవీకే పార్టీతో ఎన్నికల రణరంగంలోకి దిగడంతో తమిళనాడు ఎన్నికలు హోరాహోరీగా జరిగాయి. అటు పశ్చిమబెంగాల్‌లో వరుసగా మూడు సార్లు సీఎంగా గెలిచి హ్యాట్రిక్ కొట్టిన టీఎంసీ అధినేత్రి మమతా బెనర్జీ మరోసారి ముఖ్యమంత్రి పీఠాన్ని అధిరోహించాలని సర్వశక్తులు ఒడ్డారు. దశాబ్ధాలుగా తమకు మింగుడుపడని బెంగాల్‌ను ఈసారి కైవసం చేసుకోవాలని బీజేపీకి కూడా గట్టిగా కృషి చేయడంతో ఇక్కడ ఫలితాలు ఎలా ఉంటాయోనని దేశవ్యాప్తంగా ఆసక్తి నెలకొంది. 

తమిళనాడు ఎగ్జిట్ పోల్స్

234 అసెంబ్లీ స్థానాలున్న తమిళనాడులో అధికారాన్ని అందుకోవాల్సిన మేజిక్ ఫిగర్ 118. ఈసారి కూడా డీఎంకే నేతృత్వంలోని కూటమి అధికారంలోకి వస్తుందని.. స్టాలిన్ మరోసారి సీఎం అవుతారని మ్యాట్రిజ్, పీపుల్స్ పల్స్, పీ మార్క్, పీపుల్స్ ఇన్‌సైట్, ప్రజాపోల్, జేవీసీ వంటి సంస్థలు అంచనా వేశాయి. అన్నాడీఎంకే మరోసారి ప్రతిపక్షం తప్పదని సర్వేలు తేల్చాయి. 

ఇక కొత్తగా పార్టీ పెట్టిన దళపతి విజయ్‌ మెరుగైన ప్రదర్శన చేసినప్పటికీ అధికారం కష్టమేనని తేల్చాయి. రెండంకెల స్థానాలతో టీవీకే మూడో స్థానంలో ఉంటుందని పేర్కొన్నాయి. అయితే ఎన్డీటీవీ- యాక్సిస్ మై ఇండియా సర్వే మాత్రం.. దాదాపు 120 స్థానాలు గెలుచుకుని టీవీకే అధికారాన్ని అందుకుంటుందని అంచనా వేసింది.

పశ్చిమ బెంగాల్ ఎగ్జిట్ పోల్స్

294 అసెంబ్లీ స్థానాలున్న పశ్చిమ బెంగాల్ అసెంబ్లీలో అధికారాన్ని అందుకోవడానికి కావాల్సిన మేజిక్ ఫిగర్ 148. హోరాహోరీగా జరిగిన బెంగాల్ ఎన్నికల్లో మమతా బెనర్జీదే విజయమని ఎక్కువ సంస్థలు అభిప్రాయపడ్డాయి. అయితే బీజేపీ గట్టి పోటీ ఇచ్చి అధికారానికి చేరువగా రావొచ్చని మరికొన్ని సంస్థలు అంచనా వేస్తున్నాయి. 

కేరళ ఎగ్జిట్ పోల్స్

140 అసెంబ్లీ స్థానాలున్న  కేరళలో అధికారానికి అందుకోవాల్సిన మేజిక్ ఫిగర్ 71. మరోసారి  సీఎంగా గెలిచి హ్యాట్రిక్ అందుకోవాలన్న పినరయి విజయన్‌కు షాక్ తప్పదని అన్ని ఎగ్జిట్ పోల్స్ అభిప్రాయపడ్డాయి. ఎల్డీఎఫ్ కూటమి ఓటమి పాలై.. యూడీఎఫ్ విజయాన్ని అందుకుంటుందని, అలాగే బీజేపీ ఈసారి కేరళలో ఖాతా తెరిచే అవకాశాలు ఉన్నాయని సర్వేలు పేర్కొన్నాయి. 

అసోం ఎగ్జిట్ పోల్స్

అస్సాంలో మరోసారి ఎన్డీయే అధికారంలోకి వస్తుందని మెజారిటీ సంస్థలు అభిప్రాయపడ్డాయి. ముఖ్యమంత్రి హిమంత బిశ్వ శర్మ సారథ్యంలోని బీజేపీ- ఏపీజీ- బీపీఎఫ్ కూటమి 100 స్థానాలు గెలుచుకోవచ్చని, కాంగ్రెస్ కూటమి 24 స్థానాలకు పరిమితమై మరోసారి ప్రతిపక్షంతో సరిపెట్టుకోవాల్సిందేనని సర్వేలు తెలిపాయి. 

పుదుచ్చేరి ఎగ్జిట్ పోల్స్

30 స్థానాలున్న పుదుచ్చేరి అసెంబ్లీలో అధికారాన్ని అందుకోవడానికి కావాల్సిన మేజిక్ ఫిగర్ 17. ఈసారి కూడా ఎన్డీయే కూటమి అధికారంలోకి వచ్చి  ఎన్ రంగస్వామి సీఎం అవుతారని  ఎగ్జిట్ పోల్స్ అంచానా వేశాయి. ఎస్‌పీఏ కూటమి 12 స్థానాలు గెలుచుకుని ప్రతిపక్షానికి పరిమితం అవుతుందని సర్వేలు తెలిపాయి. ఎగ్జిట్ పోల్స్ ఫలితాల నేపథ్యంలో దేశవ్యాప్తంగా కాషాయ శ్రేణులు సంబరాలు జరుపుకుంటున్నాయి. మరి సర్వేలు వేసిన అంచనాలు నిజమవుతాయో లేదో తెలియాలంటే మే 4 వరకు వెయిట్ చేయాల్సిందే. 


తమిళనాడు ఎన్నికలు: టీవీకేకు ఊహించని దెబ్బ.. పోటీకి ముందే విజయ్‌కి తొలి ఓటమి

 


మూడు దశాబ్థాలకు పైగా సినీ కెరీర్‌ను పక్కకుపెట్టి తమిళ ప్రజలకు సేవ చేసేందుకు రాజకీయ రంగంలోకి దిగారు కోలీవుడ్ సూపర్‌స్టార్, దళపతి విజయ్. తమిళగ వెట్రి కళగం (టీవీకే) పార్టీని స్థాపించిన ఆయన రాజకీయాల్లో దూకారు. రాష్ట్రవ్యాప్తంగా సుడిగాలి పర్యటనలు చేస్తూ.. బీజేపీ, కాంగ్రెస్‌ల పొత్తు ఆఫర్లను కూడా కాదని ద్రవిడ రాజకీయ దిగ్గజాలు డీఎంకే, అన్నాడీఎంకేలను ఒంటరిగా ఢీకొట్టేందుకు సిద్ధమయ్యారు దళపతి. తమిళనాడు, పుదుచ్చేరిలలో మొత్తం స్థానాలకు అభ్యర్ధులను నిలబెట్టారు విజయ్. అనంతరం ప్రచారంలో దూసుకెళ్తున్నారు టీవీకే చీఫ్. ఈ క్రమంలో పోటీకి ముందే తమిళనాడు ఎన్నికల్లో విజయ్‌కి తొలి ఓటమి ఎదురైంది.

ఎడప్పాడి శాసనసభ స్థానానికి టీవీకే తరపున అరుణ్ కుమార్ అనే వ్యక్తికి టికెట్ కన్ఫర్మ్ కాగా.. ఆయన అభ్యర్ధిగా నామినేషన్ వేశారు. అయితే నామినేషన్ల పరిశీలన సందర్భంగా అఫిడవిట్‌లో పేర్కొన్న ప్రపోజర్ల వివరాలు సరిగా లేకపోవడంతో ఆ నామినేషన్‌ను ఎన్నికల రిటర్నింగ్ అధికారి తిరస్కరించడంతో టీవీకే శ్రేణులు షాకయ్యాయి. 

ఇక్కడే మరో ట్విస్ట్ కూడా ఉంది. ఏదైనా ఇబ్బంది తలెత్తితే సేఫ్ సైడ్‌గా ఉంటుందనే ఉద్దేశంతో మరో ప్రత్యామ్నాయ అభ్యర్ధిని కూడా టీవీకే నిలబెట్టింది. అయితే అతని నామినేషన్ వివరాలు కూడా సరిగా లేకపోవడంతో దానిని ఎన్నికల అధికారి తిరస్కరించడంతో విజయ్ పార్టీ శ్రేణులు ఖంగుతిన్నాయి. 

విజయ్ పార్టీ తరపున అభ్యర్ధి లేకపోవడంతో ఎడప్పాడిలో డీఎంకే, అన్నాడీఎంకే పార్టీల మధ్య ద్విముఖ పోరు నెలకొంది. ఇక్కడి నుంచి తమిళనాడు మాజీ సీఎం, అన్నాడీఎంకే ప్రధాన కార్యదర్శి ఎడప్పాడి పళనిస్వామి బరిలో ఉన్నారు. వరుసగా ఆరోసారి విజయం కోసం పళనిస్వామి ఎదురుచూస్తున్నారు. డీఎంకే నుంచి సీ కాశీ తన అదృష్టాన్ని పరీక్షించుకుంటున్నారు. పోటీ చేయకుండా తమిళనాడు ఎన్నికల్లో ఒక స్థానాన్ని కోల్పోవడంతో టీవీకే కేడర్ అసహనం వ్యక్తం చేస్తోంది. 

తొలి నుంచి ఎడప్పాడి నియోజకవర్గం తమిళనాడులోని వీవీఐపీ స్థానాల్లో ఒకటికావడం విశేషం. ఇక్కడి నుంచి ఎడప్పాడి పళనిస్వామి ఐదు సార్లు ఎమ్మెల్యేగా గెలుపొందారు. 1989లో తొలిసారిగా ఏఐఏడీఎంకే అభ్యర్ధిగా బరిలో నిలిచిన పళనిస్వామి విజయం సాధించారు. 1991లో జరిగిన తమిళనాడు అసెంబ్లీ ఎన్నికల్లోనూ మరోసారి గెలిచారు. ఆ తర్వాత 1996లో హ్యాట్రిక్‌పై కన్నేసిన పళనిస్వామికి అనూహ్యంగా షాక్ తగిలి, ఏకంగా మూడో  స్థానానికి పరిమితమయ్యారు. నాటి ఎన్నికల్లో పీఎంకేకి చెందిన ఐ గణేశన్ విజయం సాధించారు.

2001లో పోటీ చేయని పళనిస్వామి.. 2006లో బరిలో దిగగా మరోసారి షాక్ తగిలింది. ఈసారి ఆయన రెండో స్థానంలో నిలిచారు. నాటి ఎన్నికల్లో పీఎంకేకు చెందిన వీ కావేరి విజయం సాధించారు. అయితే 2011 నుంచి ఎడప్పాడిలో పళనిస్వామి హవా మొదలైంది. 2011, 2016, 2021 తమిళనాడు అసెంబ్లీ ఎన్నికల్లో గెలిచిన పళనిస్వామి.. జయలలిత ఆకస్మిక మరణంతో తమిళనాడు ముఖ్యమంత్రిగా బాధ్యతలు చేపట్టారు. వరుసగా హ్యాట్రిక్ సాధించిన పళనిస్వామికి ఈసారి కూడా విజయం సాధించాలని గట్టి పట్టుదలగా ఉన్నారు. 


తమిళనాడులో ఎన్డీయే సీట్ల పంపకం పూర్తి... ఒంటరిగా మిగిలిన దళపతి విజయ్

 


అసెంబ్లీ ఎన్నికలకు సమయం దగ్గరపడుతున్న నేపథ్యలో తమిళనాడులో రాజకీయ పార్టీలు పొత్తులు, సీట్ల పంపకంలో తలమునకలై ఉన్నాయి. ప్రధాన రాజకీయ పార్టీలైన డీఎంకే, అన్నాడీఎంకేలతో పాటు ఈసారి అదృష్టం పరీక్షించుకోనున్న కోలీవుడ్ సూపర్‌స్టార్ దళపతి విజయ్‌కి చెందిన  తమిళగ వెట్రి కళగంపైనే అందరిచూపు నెలకొంది. కాంగ్రెస్, బీజేపీలు విజయ్‌ని పొత్తుల్లోకి తీసుకురావాలని ప్రయత్నించినప్పటికీ.. ఆయన ససేమిరా అనడంతో రాష్ట్రంలో త్రిముఖ పోటీ ఖాయంగా కనిపిస్తోంది. తాజాగా అన్నాడీఎంకే - బీజేపీ కూటమి సీట్ల పంపకాలను పూర్తి చేసినట్లుగా వార్తలు వస్తున్నాయి.

అస్సాం, పశ్చిమ బెంగాల్, తమిళనాడు, కేరళ, పుదుచ్చేరి రాష్ట్రాల అసెంబ్లీ ఎన్నికల షెడ్యూల్‌ను కేంద్ర ఎన్నికల సంఘం ఇటీవల విడుదల చేసిన సంగతి తెలిసిందే. వీటిలో పశ్చిమ బెంగాల్, తమిళనాడు రాష్ట్రాల ఎన్నికలు ప్రస్తుతం హాట్ టాపిక్‌గా మారాయి. 15 ఏళ్లుగా బెంగాల్‌ను ఏలుతున్న మమతా బెనర్జీ ఈసారి కూడా పట్టు నిలుపుకుంటారా? లేక బీజేపీకి అధికారాన్ని అప్పగిస్తారా? అనేది హాట్ టాపిక్‌గా మారింది. ఇక దక్షిణాదిన పెద్ద రాష్ట్రంగా ఉన్న తమిళనాడు మరింత ఆసక్తికిని రేపుతోంది.

234 స్థానాలున్న తమిళనాడు అసెంబ్లీకి మార్చి 30న అసెంబ్లీ ఎన్నికల నోటిఫికేషన్ విడుదల కానుంది. మార్చి 30 నుంచి ఏప్రిల్ 6 వరకు నామినేషన్లను స్వీకరించనున్నారు. నామినేషన్ల ఉపసంహరణకు చివరి తేదీ ఏప్రిల్ 9. అన్ని స్థానాలకు ఏప్రిల్ 23న ఒకే రోజున ఎన్నికలు జరగనున్నాయి, మే 4న ఓట్ల లెక్కింపు జరగనుంది. 

తమిళనాడు ఎన్నికల్లో కాంగ్రెస్, డీఎంకే, లెఫ్ట్ పార్టీలు, వీసీకే, ఎండీఎంకే, ఐయూఎంఎల్, ఎంఎంకే, కేఎండీకే, ఎంఎన్ఎం, డీఎండీకే ఒక కూటమిగా ఉన్నాయి. అన్నాడీఎంకే సారథ్యంలోని ఎన్డీయే కూటమిలో బీజేపీ, పీఎంకే, ఏఎంఎంకే, టీఎంసీ(ఎం), పీబీకే, పీబీకే, పీడీకేలు ఒక కూటమిగా ఉన్నాయి. పీఎంకే(ఆర్), ఏఐపీటీఎంఎంకేలు మరో కూటమిగా బరిలో నిలిచాయి. దళపతి విజయ్ సారథ్యంలోని తమిళగ వెట్రి కళగం పార్టీ కూడా తమ అదృష్టం పరీక్షించుకుంటున్నాయి.

తాజాగా ఎన్డీయే కూటమిలో ఎన్నికల్లో పొత్తులు ముగిశాయి. చెన్నైలోని అన్నాడీఎంకే ప్రధాన కార్యాలయంలో జరిగిన భేటీలో అన్నాడీఎంకే ప్రధాన కార్యదర్శి ఎడప్పాడి కే పళనిస్వామి, బీజేపీ తరపున కేంద్ర మంత్రి పీయూష్ గోయల్, బీజేపీ తమిళనాడు అధ్యక్షుడు నయనార్ నాగేంద్రన్, పీఎంకే చీఫ్ అన్బుమణి రామదాస్, అమ్మ మక్కల్ మున్నేట్ర కళగం (ఏఎంఎంకే) ప్రధాన కార్యదర్శి టీటీవీ దినకర్‌లు పాల్గొన్నారు. పొత్తుల్లో భాగంగా తమిళనాడులోని మొత్తం 234 స్థానాలకు గాను 27 స్థానాల్లో బీజేపీ, 18 చోట్ల పీఎంకే, ఏఎంఎంకేకు 11 సీట్లు కేటాయించగా.. మిగిలిన 170 స్థానాల్లో అన్నాడీఎంకే పోటీ చేయనుంది. 

మరోవైపు.. డీఎంకే అధినేత, సీఎం ఎంకే స్టాలిన్ కూడా ఏవో కొన్ని స్థానాలకు తప్పించి చాలా వరకు తమ మిత్రపక్షాలకు సీట్లు కేటాయించారు. అయితే ప్రస్తుతం అందరిచూపు కోలీవుడ్ సూపర్‌స్టార్ దళపతి విజయ్‌పైనే ఉంది. తొలిసారి ఎన్నికల బరిలో నిలిచిన ఆయన సీట్ల కేటాయింపు ఎలా చేస్తారు? ఎవరికి సీట్లు కేటాయిస్తారనేది ఆసక్తిగా మారింది. విజయ్‌ని ఎన్డీయే కూటమిలోకి తీసుకురావడానికి బీజేపీ తీవ్రంగా ప్రయత్నించింది. 80 సీట్లు, డిప్యూటీ సీఎం పదవి కూడా ఆఫర్ చేసింది. అయితే టీవీకే నుంచి సానుకూల స్పందన రాలేదు.

ఈరోజు తమిళనాడులో ఎన్డీయే కూటమి పొత్తులు, సీట్లు ఖరారు చేయడంతో విజయ్ ఒంటరిగానే బరిలోకి దిగడం దాదాపు ఖాయమైంది. అయితే క్షేత్రస్థాయిలో అభ్యర్ధుల ఎంపిక ప్రక్రియ దళపతికి కత్తిమీద సాములా తయారైంది. ఆర్ధిక, రాజకీయ సమీకరణలు, ఇతర అంశాలు విజయ్‌కి ఏమాత్రం మింగుడు పడటం లేదు. అభ్యర్ధులుగా పోటీ చేసేవారు కనీసం 5 కోట్ల రూపాయల ఖర్చును భరించగలిగే స్థోమత ఉంటేనే టికెట్లు ఇచ్చే పరిస్థితి ఉందంటూ టీవీకే అంతర్గత చర్చలు బయటకు రావడం వివాదాస్పదమైంది. 

తమిళ రాజకీయ దిగ్గజాలు డీఎంకే, అన్నాడీఎంకేల అంగబలం, అర్ధబలాన్ని ఎదురొడ్డి నిలబడటం అంత తేలిక కాదని టీవీకే అధినేతతో పాటు ఆ పార్టీ కేడర్‌కు తెలియనది కాదు. వారితో పోటీపడాలంటే భారీగా ఖర్చు చేయాల్సి ఉండటంతో గెలిచే స్థానాలు తప్పించి, రిస్క్ ఉన్న చోట ధైర్యం చేసేందుకు టీవీకే ఆశావహులు సిద్ధంగా లేరన్న ఊహాగానాలు వినిపిస్తున్నాయి. 

టీవీకే టికెట్ల కోసం మొదట 10 వేల మంది దరఖాస్తు చేసుకోగా.. ఎన్నికల సమయం దగ్గరపడుతున్న వేళ ఈ సంఖ్య 7 వేలకు పడిపోయిందని వార్తలు వస్తున్నాయి. దాంతో అసలు రాష్ట్రంలోని 234 స్థానాలకు విజయ్ తన అభ్యర్ధులను నిలబెడతారా? లేక బలమున్న చోటే బరిలో దిగుతారా అన్న చర్చ జరుగుతోంది. ఇలాంటి అనిశ్చితి వేళ దళపతి తన టీవీకేను ఎలా ఎన్నికలకు సిద్ధం చేస్తారనేది ఆసక్తిగా మారింది. 


సిద్ధిపేటపై రేవంత్ కన్ను... హరీష్‌‌రావును గెలవడం అంత ఈజీయా?

 


సిద్దిపేట జిల్లా నంగునూరు మండలం నర్మెట్టలో పర్యటన సందర్భంగా తెలంగాణ  ముఖ్యమంత్రి రేవంత్ రెడ్డి చేసిన వ్యాఖ్యలు తెలుగు రాజకీయాల్లో ప్రకంపనలు సృష్టిస్తున్నాయి. సిద్ధిపేటలో ఎమ్మెల్యేగా గెలిచిన వారికి మంత్రివర్గంలో స్థానం కల్పిస్తానని ఆయన బహిరంగంగా ప్రకటించడం ఈ పొలిటికల్ హీట్‌కు కారణం. రేవంత్ రెడ్డి చెప్పినట్లుగా సిద్ధిపేటలో గెలిచినవారికి మంత్రి పదవి విషయాన్ని పక్కనపెడితే.. అసలు గెలిచే వ్యక్తి ఎవరు? అసలు సిద్ధిపేటలో గెలవడం అంత ఆషామాషీ కాదని రాజకీయ విశ్లేషకులు చెబుతున్నారు. 

ఒకప్పుడు కాంగ్రెస్ పార్టీకి కంచుకోటగా ఉన్న సిద్ధిపేట అసెంబ్లీ నియోజకవర్గం.. కే చంద్రశేఖర్ రావు (కేసీఆర్) ఎంట్రీతో కల్వకుంట్ల కుటుంబానికి అడ్డాగా మారింది. 1985 నుంచి నేటి వరకు దాదాపు 40 ఏళ్లుగా కేసీఆర్ కుటుంబ సభ్యులే ఇక్కడి నుంచి గెలుస్తున్నారంటే సిద్ధిపేటలో పరిస్ధితి ఎలా ఉందో అర్ధం చేసుకోవచ్చు. 1985, 89, 94, 99 అసెంబ్లీ ఎన్నికల్లో తెలుగుదేశం పార్టీ తరపున కేసీఆర్ వరుసగా గెలిచారు. ఆ తర్వాత తెలంగాణ ఉద్యమంలోకి దూకిన కేసీఆర్.. టీడీపీకి రాజీనామా చేసి తెలంగాణ రాష్ట్ర సమితిని స్థాపించారు. 2004 అసెంబ్లీ ఎన్నికల్లో టీఆర్ఎస్ తరపున పోటీ చేసి విజయం సాదించారు. 

2004లో ఎంపీగా పోటీ చేసిన కేసీఆర్.. యూపీఏ హయాంలో కేంద్రమంత్రిగా అవకాశం దక్కడంతో సిద్ధిపేట ఎమ్మెల్యే పదవికి రాజీనామా చేశారు. తనకు బదులుగా తన మేనల్లుడు తన్నీరు హరీష్‌రావుని ఉప ఎన్నిక బరిలో నిలబెట్టి గెలిపించారు కేసీఆర్. నాటి నుంచి సిద్ధిపేటలో హరీశ్‌రావు శకం మొదలైంది. 2009 అసెంబ్లీ ఎన్నికలు, 2010 ఉపఎన్నిక, 2014, 2018, 2023 ఎన్నికల్లో హరీష్‌రావు వరుస విజయాలు సాధించి డబుల్ హ్యాట్రిక్ అందుకున్నారు. వైఎస్ రాజశేఖర్ రెడ్డి, కేసీఆర్ కేబినెట్‌లలో హరీష్‌రావుగా మంత్రిగా పనిచేశారు.

అధికారంలో ఉన్నా లేకున్నా సిద్ధిపేట అభివృద్ధిపై హరీష్‌రావు ప్రత్యేక శ్రద్ధ తీసుకున్నారు. ప్రత్యేక జిల్లా చేయడం దగ్గరి నుంచి, తాగునీరు, పక్కా రోడ్లు, డ్రైనేజీ, సుందరీకరణ ఇతర అభివృద్ధి కార్యక్రమాలు నిర్వహించారు. అలాగే నిత్యం ప్రజలకు అందుబాటులో ఉంటూ మాస్ లీడర్‌గా ఎదిగారు. హరీష్‌రావు అంటే సిద్ధిపేట.. సిద్ధిపేట అంటే హరీష్‌రావు అన్నంతగా గుర్తింపు తెచ్చుకున్నారు. 

సిద్ధిపేట పట్టణంతో పాటు నియోజకవర్గంలోని ప్రతి వార్డ్‌లో ఆయనకు మద్ధతుదారులు, సానుభూతిపరులు, అభిమాన గణం ఉంది. ఎన్నిక ఏదైనా సరే.. ఎప్పుడొచ్చినా  సరే.. హరీష్‌రావుదే విజయమని ప్రత్యర్ధులు సైతం ఒప్పుకుంటారు. అలాంటి సిద్ధిపేటలో హరీష్‌ను కాదని వేరే పార్టీ జెండా ఎగరడం అసాధ్యమని స్థానికులు చెబుతున్నారు.

సిద్ధిపేటలో హరీష్‌ను ఢీకొనే స్థాయి నేతలు లేరు. ప్రధాన రాజకీయ పార్టీలకు ఇక్కడ బలమైన నేతలు లేరు. కాంగ్రెస్, బీజేపీలకు సరైన నేతలు, అభ్యర్ధులు లేరు. దీనికి తోడు బీఆర్ఎస్ ట్రబుల్ షూటర్‌గా, చాణక్యుడిగా పేరు తెచ్చుకున్న హరీష్‌రావు వ్యూహాల ముందు మరో నేత నిలబడగలరా అనేది మిలియన్ డాలర్ల ప్రశ్న. అయితే దశాబ్ధాల బీఆర్ఎస్ కంచుకోటను బద్ధలు కొడతామని, సిద్ధిపేటలో కాంగ్రెస్ జెండా ఎగురవేస్తామని సీఎం రేవంత్ రెడ్డి చెబుతున్నారు. 

సిద్ధిపేటలో అభివృద్ది కార్యక్రమాలతో పాటు కేడర్ బలోపేతంపై సీఎం దృష్టి సారించారు. ఎన్నికలకు రెండేళ్లకు పైగా సమయం ఉండటంతో దీర్ఘకాలిక వ్యూహాన్ని రచిస్తున్నారు రేవంత్ రెడ్డి. సిద్ధిపేట కంచుకోటను బద్ధలు  కొట్టేందుకు సీఎం స్థాయి వ్యక్తి బరిలో దిగడంతో పాటు దశాబ్థాల  తన ఉనికిని కాపాడుకునేందుకు హరీష్‌రావు వ్యూహాల నేపథ్యంలో 2029 సిద్ధిపేట ఎన్నికల సమరం రసవత్తరంగా సాగే అవకాశం ఉందని విశ్లేషకులు అంచనా వేస్తున్నారు. 


ఏదో ఒకనాడు సీఎం అవుతా.. అందరి లెక్కలు తేలుస్తా: కల్వకుంట్ల కవిత

 


బీఆర్ఎస్, కాంగ్రెస్ పార్టీలపై విరుచుకుపడ్డారు తెలంగాణ జాగృతి అధ్యక్షురాలు కల్వకుంట్ల కవిత. ఇటీవల బీఆర్ఎస్ నేతలు తనపై చేసిన వ్యాఖ్యలకు ఆమె కౌంటరిచ్చారు. దీనిలో భాగంగా డిసెంబర్ 12 శుక్రవారం నాడు హైదరాబాద్‌లో కవిత ప్రెస్‌మీట్ నిర్వహించారు. తెలంగాణ వ్యాప్తంగా నేను చేస్తున్న పర్యటనలతో అక్రమాల పుట్టలు కదులుతున్నాయి, వాళ్ల పాపాల పునాదులు కదులుతుండటంతో నా మీద దాడి ప్రారంభించారని కవిత మండిపడ్డారు. నేను కాంగ్రెస్ పార్టీతో అంటకాగుతున్నానని, కాంగ్రెస్ పార్టీతో అవగాహన కుదుర్చుకుని మాట్లాడుతున్నానని, ఆర్ధిక ప్రయోజనాల కోసం నేను పనిచేస్తున్నానని ఆరోపిస్తున్నారు. నేను ఎప్పుడైతే జాగృతి - జనం బాట అని మొదలుపెట్టానో అప్పటి నుంచే దాడి మొదలైందని కవిత అన్నారు.

ముందు సోషల్ మీడియాలో ఒక ప్రచారం మొదలుపెట్టారు. నా భర్త అనిల్ కుమార్, ఏవి రెడ్డి అనే వ్యాపారవేత్తతో ఏదో లాండ్ డీలింగ్ చేశారని.. దాని వల్ల నాకు పెద్ద ఎత్తున ఆర్ధికంగా ప్రయోజనం జరుగుతోందని, నాకు కాంగ్రెస్ పార్టీకి అవినాభావ సంబంధం ఉందని ప్రజల్లోకి తీసుకెళ్తున్నారు. ఈ వెకిలి ప్రయత్నాలు చేస్తున్న గుంట నక్కలందరికీ చెబుతున్నా.. నేనింకా మీ చిట్టా విప్పడం ప్రారంభించలేదు. ఓన్లీ టాస్ వేశానని.. అప్పుడే ఇలా భయపడితే ఎలా? రేపటి నుంచి టెస్ట్ మ్యాచ్ ఉంది. ఇప్పటికే అందులో గెలిచాం. మీరు అధికారంలో ఉన్న పదేళ్లలో నా భర్త ఏదైనా పని చేసి పెట్టమని అడిగాడా? కేసీఆర్ గారితో కానీ, కేటీఆర్ గారితో కానీ, హరీశ్ రావు గారితో కానీ.. నా భర్త కానీ, నేను కానీ ఏమైనా ఫేవర్ తీసుకుని ఉంటే దమ్ముంటే చెప్పాలని కవిత సవాల్ విసిరారు.

ఉరుకుంటుంటే తమాషాలు చేస్తున్నారు. మీ వెకిలి ప్రయత్నాలు మానుకోండి. నేను మీ మీద చేసిన ఆరోపణలకు దమ్ముంటే జవాబు చెప్పండి. అంతేకానీ నా మీద మొరిగేవాళ్లని వదిలిపెట్టి, ఏదిపడితే అది మాట్లాడితే చూస్తూ ఊరుకోను. నేనేం తప్పు చేయలేదు.. బీఆర్ఎస్ అధికారంలో ఉన్న పదేళ్లలో ప్రభుత్వం నుంచి నేను ఒక్క రూపాయి కూడా లాభం పొందలేదు. మీరు చేసిన అక్రమాలన్నీ నా మీద ఆపాదించాలని చూస్తే ఊరుకునే వ్యక్తిని కాదు. నీతి, నిజాయితీ నా వైపు ఉన్నాయి కాబట్టే నేను ధైర్యంగా కుండబద్ధలు కొట్టినట్లు మాట్లాడుతున్నాను. నాకు ఎవ్వరితోనూ అండర్ స్టాండింగ్ లేదు.. ఎవ్వరితోనూ వ్యాపారాలు లేవని కవిత స్పష్టం చేశారు.

బీఆర్ఎస్ అధికారంలోకి వచ్చాక నేను, నా భర్త ఒకటే అనుకున్నాం.. అమెరికా నుంచి 2004లో మేం వస్తే నేను ఉద్యమంలో ఉన్నా, ఆయన వ్యాపారంలో ఉన్నాడు. ఇల్లు గడవాలి కదా? మీలాగా మంది మీదపడి దోచుకోలేదు. వసూళ్లు చేసుకుని ఉద్యమాలు నడపలేదు.. సమయం, సందర్భం వచ్చినప్పుడు నా నగలు కుదువపెట్టి బతుకమ్మ చేశా. అందుకే ఇంత పౌరుషం నాకు.. ఉద్యమంలో ఉన్నప్పుడు మీరు ఎవరెవరి దగ్గర దోచుకున్నారు. ఏయే స్టూడియోల దగ్గరికి పోయి ధర్నాలు చేసి వాళ్లతో కాంప్రమైజ్ అయ్యారు. అన్ని కథలు నాకు తెలుసు.. కానీ చెప్పలేను. మీరు నాతో పెట్టుకుంటే మాత్రం మామూలు చిట్టా లేదు నా దగ్గర అని కవిత వార్నింగ్ ఇచ్చారు.

నా భర్త ప్రైవేట్ భూమిలోనే రియల్ ఎస్టేట్ వ్యాపారం చేశారు.. ఎన్నడూ ప్రభుత్వ భూమి జోలికి వెళ్లలేదు, ప్రజలకు నష్టం కలిగించేలా ఒక్క రూపాయి పని కూడా మేం చేయలేదు. జనంలోకి వెళ్తున్న నన్ను డిస్ట్రబ్ చేద్దాం, మైండ్ కరాబ్ చేద్దాం అనే ఆలోచనలు పెట్టుకుంటే చూస్తూ ఊరుకోను. పదేళ్ల బీఆర్ఎస్ పాలనలో నాకు ఏ విషయంలోనూ సంబంధం లేదు. నన్ను నిజామాబాద్ వరకు పరిమితం చేశారు. ఐదేళ్లు మాత్రమే నేను పవర్‌లో ఉన్నా.. ఆ సమయంలో ఢిల్లీ, నిజామాబాద్, హైదరాబాద్.. నా ట్విట్టర్, నా క్యాలెండర్ చూసుకోండి. అప్పుడు కూడా మన ఊరు - మన ఎంపీ పేరు పెట్టుకుని నిరంతరం ప్రజల మధ్యలో ఉన్నా. పైరవీలు ఏనాడూ చేసుకోలేదు.. నేను చాలా గర్వంగా ఫీలయ్యా. నేను తెలంగాణ నుంచి మొదటి ఎంపీగా పార్లమెంట్‌కు వెళ్లా. మేం ఢిల్లీలో కొట్లాడుతుంటే మీరు ఏసీ ఆఫీసుల్లో ఉండి కేసీఆర్ గారి నీడన చేరి ప్రజల సొమ్ము చేరింది కాకుండా నా మీద వెకిలి ప్రయత్నాలు చేస్తూ ఒక్కొక్కొడికి కాళ్లు విరగ్గొడతానని కవిత హెచ్చరించారు.

నా భర్తపై ఆరోపణలు చేయడంతో పాటు ఆయన ఫోన్ ట్యాప్ చేశారు. ఇంటి అల్లుడి ఫోన్ ట్యాప్ చేయడానికి సిగ్గుండాలి. ఇంత చేస్తున్న కళ్లు చల్లబడటం లేదా? పార్టీలో నుంచి వెళ్లగొట్టారు ఇంకేంటి. కాంగ్రెస్ పార్టీ భూముల్ని ధారాదత్తం చేస్తుందని అంటున్నారు.. అసలు ఇలాంటి దానికి బీజాలు వేసింది ఎవరు? లీజుకు ఇచ్చిన భూముల్లో ప్రజలకు డబుల్ బెడ్‌రూం ఇల్లు కట్టించాలి. హాస్పటల్స్ కట్టాలి, స్కూల్స్ కట్టాలి. ప్రైవేట్ వ్యక్తులకు అమ్మేటప్పుడు కేటీఆర్ గారు ఎలా సంతకం చేశారు. మీరు కిటికీలు తెరిచారు. ఈ గవర్నెమెంట్ దర్వాజాలు తెరిచింది దోచుకుని తినమని. నా మీద, నా భర్త మీద బీఆర్ఎస్ పార్టీ చేస్తోన్న విష ప్రచారంతో మాకు ఎలాంటి సంబంధం లేదు. దానికి సంబంధించిన అన్ని ఆధారాలు మీకు చూపించానని కవిత తెలిపారు.

దేవుడి దయ వల్ల ఏదో రోజు నేను ముఖ్యమంత్రిని అవుతాను కదా .. 2014లో తెలంగాణ వచ్చినప్పటి నుంచి ఇప్పటి వరకు అన్ని అన్యాయాలపై నేను ఆరా తీస్తాను. తప్పు చేస్తే నేనే క్షమాభిక్ష కోరతా. ఇప్పటికే జనం బాటలో క్షమాపణలు కోరాను. నేను అస్సలు మంచి దానిని కాదు.. కేసీఆర్ గారంత ఓపిక నాకు లేదు. నన్ను ఒకటి కొడితే రెండు కొడతా. ఎంపీ క్యాండిడేట్‌గా డిక్లర్ చేయండి.. ఎక్కడ ఓడిపోయానో అక్కడే ప్రజల ప్రేమ గెలుచుకుంటానని చెప్పాను. బలవంతంగా ఎమ్మెల్సీ కట్టబెట్టారు. నేను అమెరికా నుంచి వచ్చినప్పటి నుంచి నేటి వరకు పార్టీ సహకారం లేదు.